نعطيك عمري ونزيد…

[et_pb_section admin_label=”section” fullwidth=”off” specialty=”on”][et_pb_column type=”3_4″ specialty_columns=”3″][et_pb_row_inner admin_label=”row_inner”][et_pb_column_inner type=”4_4″ saved_specialty_column_type=”3_4″][et_pb_text admin_label=”النص”]

بقلم: هبة المازني

نعطيك عمري ونزيد
يا بنت الساحل
بنت الجنوب
باجة صفاقس وسيدي بوزيد
تحمّر وتغبّر من العيد للعيد
تلبس الروبة
و تحط فولارة مريشة منقوبة
على خاطر في صغرها قالولها عيب
شعرك تخبّيه من الغول والذيب
و الرجال
و ترد بالك من الكلام والأفعال
على خاطر وقتك مازال
ولازمك تتخبّى
في قفص أظلم جنابو من الخوف تتعبّى
تعاون امّك في الدار
تكبر نعرسولك وتجيب كمشة صغار
تتسّمى عشت الدنيا طول بعرض
و عملت الفرض
وخدمت التراب والأرض
وما تنساش الفولارة
تخزرلك خزرة خيثة مقعارة
تقلك قداشك حلوّة ومصرارة
محلا زينك
و شعرك الطويل المهمّل وتذبيلة عينك
نحّينــي
في صندوق قديم خبيني
وعيش حياتك بلا خوف يا ديني
… ما تسمعهاش
كلام الليل مدهون بالزبدة
والكلام هذاكا يتسمع ما يتعاش
نعطيك عمري ونزيد
كي ترا في عينيك مرارة
وعلى خدّك ضحكة مصفارة
روحك على الفن مغيارة
وفي مخّك سمفونية و عود وقيتارة
وحلمة من أحلام العذارى
تحب تتمرّد
في البحر تغرق وبالرمل تتخلط
بماه تتسرّد
وعلى شطّو تعيش وتتشرد
فدّيت من الطبعة والعجين
والحطب والشمعة والقوجة والطاجين
وملّي مكتوب على الجبين
وملّي قررولك واختارو
العرس والدار والراجل وخنارو
امشي يا زمان وايجا يا زمان
والحال هوّ الحال
معّاش فمّة امان
الحل هو العصيان
العصيان
العصيان..
صرّه حوايج ملمدين في فولارة.. و باكو دخان
سارقتّو من عند الجيران
سرقة؟..
أي سرقة
هوما زادا حبّو يسرقولي شبابي و يعطوه لولد فلان
نعطيك عمري ونزيد
يا سمرة
يا مسافرة على ضو القمرة
بين دخان السواقر والسكر والخمرة
زعما في الصباح..
كي تطلع اللي تفضحني و تضوّي الدنيا
باش يكثر الغش والصياح؟ ولا شوية بكا ونواح؟
على بنتهم اللي ضاعت
عملت من الموسيقى جوانح وطارت
اللي صار صار
عرفت آش تختار
وارتاحت مل الهم والشقا والكبت والدمّار
وطارت
… جنحت وطارت
ثنية البحر اختارت
نعطيك عمري ونزيد
كي تسهر الليل
تذوق الويل والطريق طويـــــل طويل
وتشق الثنايا وتغني وتدندن
على ضايعة في بلادها
على مبهمة في عبادها
على اللي تفركس في ندادها يوريوها طريق البحر منين
حفاة الساقين
وتجرحت اليدين وبكات العينين لين غسلو الخدين
قليّ بربي.., طريق البحر منين؟
نعطيك عمري ونزيد
كي ترا الشط وتضحكلو
ترمي الفولارة و النيكوتين
وتغمض العنين وتحل الوذنين
تجي نسمة تلعبلها بشعرها
كيف يد الميمة في صغرها
تتفكر قبرها اللي فيه المالي
الي عاشرت فيه الذيب والزوالي
تتقلّق
بالبحر تزيد تتعلّق
والصحيح من الغالط تفرّق
تغني للموج
لا حس لا جوجمة ولا هيجوج وميجوج
تلعب بالرملة ترسم حكايات
تخطط لغدوة المعبي مشاريع وأفاريات
تتفكر الام والخوات..
قلبها مات
اللي معيشها توا الفن
هو الدنيا والي فيها
هو الغطا والكفن
نعطيك عمري ونزيد
كي تهرب لبعيد
وتشطح على الدربوكة والزغاريد
شعرها يطير بلا قيود..
هذا الحب وهذا اللي قلبها يريد
نعطيك عمري ونزيد
نعطيك عمري ونزيد

[/et_pb_text][/et_pb_column_inner][/et_pb_row_inner][/et_pb_column][et_pb_column type=”1_4″][et_pb_sidebar admin_label=”Sidebar” orientation=”right” background_layout=”light” area=”sidebar-1″ remove_border=”off”] [/et_pb_sidebar][/et_pb_column][/et_pb_section]

Please follow and like us: