مفتاح الصول
بقلم: رميساء المرسني
ليلة مسروقة من حكايات ألف ليلة و ليلة …
ليلة فيها الدمعة قدّام الفرحة ذليلة…
ليلة ستنّيتها عمري الكل …
و كان تتعاود سنين منها ما نمل …
ليلة فيها حبّينا و تحبّينا…
و الحب اللي ياما تمنيناه … بيه حسّينا …
القلب الي ياما ميّت ظنّيناه…
طلع حي … و بنبضاتو خرجنا للدنيا من تحت اللحود و حيينا …
صدّق …
حلمة ولاّت حقيقة…
ونارها في الوهم تحرق …
صدّق…
و أحلامك في حيط المتحقق لصّق …
و اكتب عليهم بالأحمر …
حـقـيـقـة…
محلاها الفرحة في عينينا …
و محلاها الدّمعة شايحة على خدّينا …
محلاها الدّنيا و ما أوسعها و مزينها بينا …
محلاها و أحنا ضايعين في ثناياها …
اليد في اليد…
كيف تضيق بينا… المحبّة راسها يسد…
و وقت يجد الجد…
نلقاك انت حضن و سند …
محلاني … محلاني و أنا معاك …
و محلاك و انت معايا …
انت فرحتي، بسمتي، حلمتي وهنايا… انت مكتوبي و زينة الحكاية …
انت مفتاح الصّول اللي بيه باش نبدى نوتات الغناية …
انت… أنا…
أحنا واحد و ربّي واحد…
و حفّار قبرك و قبري شاهد…
ايجا عنقني و من حضنك ما تعتقني…
خبيني و بين يديك الحب حسّسني و ورّيني…
ايجا نهبلو…
نباتو لبرّا في السرد…
ندفيك و تدفّيني …
ايجا نحكيلك برشا حكايات…
و نسمعو برشا موزيكا و نكتبو برشا غنايات …
ايجا نعنقك على ضو القمرة و نوشوشلك في وذنك برشا حب…
عسل مدهون بحلاوة الكلمات …
أنا و انت صبرنا و ستنينا…
و المكتوب في صفحاتو جمعنا…
أنا و انت في ثنايا الدّنيا تلاقينا…
و شي ما باش يفرّقنا…
أنا ليك و انت ليّا…
طريقي هو طريقك… و مع بعضنا نكملو الثنيّة…
كان نحكيو للعباد حكايتنا أتو يضحكو علينا…
و يستغربو كيف يراونا نمشيو الجنب في الجنب …
و هالة عشقة دايرة بينا… و يحيرو في لمعة عينينا … و ضحكتنا اللي ما تفارقنا …
هبلنا …
الحب هبال…
خلينا نهبلو…
و نغامرو و نقمرو و ناخذو الريسك و نمشيو للمجهول…
و العقل خلّيهولهم…
باش نهبل بيك و تهبل بيا…
نمرض بيك و تمرض بيا…
أنا داك و دواك …
و انت السم و القلب اللي ينبض بالدّم…
ايجا نقلبو الطرح و الطاولة و نهربو و ورانا ما نخلّيوش أمارة …
و بأقلام ملونة نكتبو وصيّة مسرارة…
“يا واقفا على قبري… ابسط يديك للخالق و اقرأ فاتحتين… فهنا مرقد عاشقين… في جنتهما بنار الحب مكتويين” …
انت آدم الأسمر و أنا حوّاء مولات العينين المحوّرة…
ايجا ناكلو التفّاحة و نهبطو لأرضهم ميسالش …
مادام انت معايا أنا في جنة… انت جنتي و أنا غيرك ما نتمنّى …
صدّق…
و أحلامك في حيط المتحقق لصّق …
و اكتب عليهم بالأحمر
…
حـقـيـقـة…
Related Posts
About The Author
